ഉള്ളകം 

മുയൽക്കുട്ടിയുടെ രൂപമുള്ള ,
മേഘത്തിനു കീഴിലാണ്-
ഞാനെന്റെ സ്വപ്നങ്ങളെ ,കുഴിച്ചു മൂടിയത് .
സ്വപ്‌നങ്ങൾ,
ചെമ്പകമായി പൂത്തുലഞ്ഞപ്പോഴാണ് ,
മുയൽക്കുട്ടി പെയ്തു വീണത് .
സ്വപ്നങ്ങൾക്ക് ചെമ്പകപ്പൂവായി പുനർജ്ജനി ...

            നീ ബാക്കിവയ്ക്കാതെ പോയ ഞാനാണ്,
            പുഴയിൽ സ്വപ്നങ്ങളൊക്കെയും ,
            കഴുകി ഒഴുക്കിയിട്ട്-
            മരുഭൂമിയിലേക്ക് ,
            അപ്രത്യക്ഷയായത് ...
            ഒരിത്തിരി എന്നെ നീ ശേഷിപ്പിച്ചിരുന്നെങ്കിൽ ,
            മഴവില്ലിന്റെ ചിത്രം വരച്ചേനെ ഞാൻ .....
            പൊള്ളയായ അകം
            ചിതറിത്തെറിച്ച ചില്ലുകൂട്
            ചോരവാർന്ന് വിളറിയ മനസ്സ് ......

നീയും ഞാനും 

പറക്കട്ടെ ഞാൻ ...?

ദിക്കുകൾക്കു മേലെ ,

ആകാശം തുളച്ച് മേലോട്ട് ...

മേഘങ്ങൾക്ക് മേലെ ഇരുന്ന് ,

താഴേക്ക് കണ്ണെത്തിക്കട്ടെ ?

കുതിച്ചു കുതിച്ച്‌ വീണ്ടും 

മുകളിലേക്ക് പറന്നുയരട്ടെ ?

എത്ര മേലെ പറന്നാലും 

എന്റെ ചരട് നീ മുറുകെ പിടിക്കുമോ ?

എന്റെ വേര് നീ കാത്തുവയ്ക്കുമോ ...

                  

                  നിന്റെ വിരലുകൾ മുറുകെ പിടിച്ച -

                  ഒരു ചരടിന്റെ അറ്റത്താണ് ,

                  എന്റെ ആകാശപ്പറക്കൽ .

                  എത്ര മേലെ പോയാലും,

                  നീയൊന്നാഞ്ഞു വലിച്ചാൽ ,

                  നിന്റെ മുന്നിലുണ്ട് ഞാൻ ,

                  ഏതു മരുഭൂമിയിലായാലും ...

മുഖവുരയില്ലാതെ വഴുതിവീഴാൻ 

നീയെന്ന മറവിയാണെനിക്ക് പ്രിയം 

മൗനത്തിന്റെ ഇടവേളകളിലും 

എന്നിൽ നിറഞ്ഞു കവിയുന്ന നീയാണ് -

എന്റെ നീ ....

മേഘങ്ങൾക്ക് മേലെ പറന്നകന്നാലും ,

നീ മുറുകെ പിടിച്ച ചരടിലാണ് ,

എന്ന ഓർമ്മപ്പെടുത്തലിന്റെ സൗഖ്യം ....

കടുംകെട്ട് 

എവിടെയോ ഒരു കെട്ടുണ്ട് .

നിന്റെയുള്ളിലോ എന്റെയുള്ളിലോ 

അതോ ,

നിന്റെയും എന്റെയും 

ഉള്ളങ്ങളെ ചേർത്തുവയ്ക്കുന്ന ,

നേർത്ത ചരടിലോ ..

അല്ലെങ്കിൽ ,

നമുക്ക് ചുറ്റും വരിഞ്ഞു മുറുകിയ ഒന്നിലോ ....

ഏതോ ഒന്നിൽ ,

ഒരു കെട്ടുണ്ട് .

പണ്ടു പണ്ടേ ഒരിക്കൽ ,

അഴിച്ചു വിടേണ്ടിയിരുന്ന 

ഒരു കടുംകെട്ട് ......

പട്ടം   

പൊട്ടിയകലുന്ന നൂലാണ് ,

ഏതു പട്ടത്തിന്റേയും സ്വപ്നം .

പറന്നുയർന്ന് അപ്രത്യക്ഷമായാലും,

മുള്ളിൽ വീണു ചീന്തിയാലും ,

പൊട്ടിയ നൂലാണ് 

ഏതു പട്ടത്തിന്റെയും മോഹം .

മറ്റൊരുവന്റെ വിരൽത്തുമ്പിലെ ,

ചലനത്തിനൊപ്പം പറക്കുന്നതിനേക്കാൾ ,

സ്വതന്ത്രമായി മണ്ണിൽ വീണുലയുകയാണ് ,

പട്ടത്തിന്റെ സാഫല്യം...