നീ / നമ്മൾ 

പെട്ടെന്ന് ഒരു ദിവസം ലോകം എനിക്കും , 

ഞാൻ ലോകത്തിനും അപ്രത്യക്ഷമായി പോകുന്നത് ഓർത്തുപോയി ...

നീ കരഞ്ഞു പോകുമോ ....

പ്രിയപ്പെട്ടവളെ എന്നൊരു ആർത്തനാദം ,

നിൻ്റെ  തൊണ്ടക്കുഴിയിൽ ആരുമറിയാതെ അലിഞ്ഞു പോകുമോ ....

നീ എന്നെ കേൾക്കുമായിരുന്ന ,

ഞാൻ നിന്നെ കേൾക്കുമായിരുന്ന അസംഘ്യം നിമിഷങ്ങൾ നമുക്കിടയിൽ 

ആരുമാരുമറിയാ തെ മാഞ്ഞു പോകുന്നത് നീ ഓർത്തു നോക്കിയോ ?

ഇനി നിൻ്റെ  ഉറക്കങ്ങൾക്ക് ഭംഗം വരാത്തവണ്ണം ഞാൻ ഇല്ലാതായിപ്പോയാൽ ,

നിൻ്റെ  അമൂർത്തമായ സ്വപ്നങ്ങളിൽ ഞാൻ വന്നു പോകുമോ ?

എന്നെ ഒന്ന് നെഞ്ചിൽ ചേർത്ത് പിടിച്ചില്ലല്ലോ എന്ന് ,

എൻ്റെ  ചൂട് നീ അറിഞ്ഞില്ലല്ലോ എന്ന് നിസ്സഹായപ്പെട്ട് ,

നിൻ്റെ  മുറിയുടെ ഇരുട്ടിൽ ,

നിൻ്റെ  കിടക്കയുടെ ഓരത്ത് ഞാൻ വിതുമ്പുന്നത് നിനക്ക് കേൾക്കുവാനാകുമോ ?

പ്രിയപ്പെട്ടവനെ ....

നിന്നെ ഒന്ന് കെട്ടിപ്പിടിക്കാതെ 

എനിക്ക് മരിച്ചുപോകാൻപോലും ആവില്ലല്ലോ 

ReplyForward Add reaction

 മാഞ്ഞു പോയ പെൺ  സ്വപ്നങ്ങളെ എണ്ണി നോക്കിയിട്ടുണ്ടോ 

അവയുടെ നേർത്ത പാടുപോലും അവളുടെ മുഖത്തോ 

മനസ്സിൽ പോലുമോ കാണാനാവില്ല .

മാഞ്ഞു പോയ പെൺ സ്വപ്നങ്ങളെന്നാൽ 

മരിച്ചു മണ്ണടിഞ്ഞ ഒരു ജന്മമെന്നാണ് അർത്ഥം 

ഓർത്തു നോക്കിയാൽ അവൾക്കു തന്നെ 

അതിൻ്റെ നൂലറ്റങ്ങൾ കണ്ടെത്താനാവില്ല 

എന്നെങ്കിലും പങ്കുവച്ച സൗഹൃദങ്ങളിൽ നിന്നാവും ,

തനിക്ക് അങ്ങനെ ഒരു കിനാവ് ഉണ്ടായിരുന്നുവെന്ന് 

അവൾ തന്നെ അറിഞ്ഞെടുക്കുക 

അപ്പോഴേക്ക് അതിൻ്റെ നിറം വറ്റി വറ്റി 

ചേലില്ലാത്തൊരു പഴന്തുണി പോലെ 

അത് അവളെ പ്പോലും മോഹിപ്പിക്കാതെ 

എവിടെയോ ചുളുങ്ങി കിടക്കുന്നത് കാണാം 

നെഞ്ച് തകരുന്നൊരു തിരിഞ്ഞു നോട്ടത്തിൽ 

അവൾ ജീവിതമെന്നു പേരിട്ട പ്രവൃത്തികളിലേക്ക് കടക്കും 

പിന്നെ എന്ത് സ്വപ്നങ്ങളെന്ന് ദീർഘനിശ്വാസം കൊള്ളും 

പ്രണയിക്കപ്പെടാത്ത പെണ്ണുങ്ങളാണ് 

ആലിപ്പഴമായി പെയ്തു തൂവിപ്പോകുന്നത് 

 നഷ്ടം 

പറയാതെ പോയൊരാ -

വാക്കിൻ്റെ നോവിനാൽ ,

നഷ്ടബോധങ്ങളെ -

പെറ്റുകൂട്ടുന്നു ഞാൻ 

അറിയാതെ പോയൊരാ -

പ്രണയാക്ഷരങ്ങളെ ,

ഹൃദയരക്തം ചേർത്ത് -

വരഞ്ഞു തീർക്കുന്നു ഞാൻ 

ഒരു വാക്കിനപ്പുറം -

നീ കാത്തു നിന്നതും ,

മൃഗതൃഷ്ണ പോലിന്ന് -

തോന്നലാകുന്നുവോ ...

ജന്മാന്തരങ്ങളിൽ -

വീണ്ടും തളിർക്കുന്ന ,

മോഹ പുഷ്പങ്ങളിൽ -

കൂട്ടായ് പിറക്കുമോ ..

ഇനിയെൻ്റെ ജീവൻ്റെ -

ശേഷിപ്പു നുകരുന്ന ,

സ്വപ്നപുഷ്പങ്ങളെ ,

നീ കാത്തുവയ്ക്കുമോ ...

ഇനിയൊരു ജന്മമുണ്ടെങ്കിൽ ,

നിനക്കായ് ഞാൻ -

ഹൃദയം നുറുങ്ങുന്ന -

പ്രണയം പകുത്തിടാം ...... 

 

നിരാശ 

നിരാശപടർന്നുകയറിയ മനുഷ്യൻ്റെ കണ്ണുകളിലേക്ക് -

നിങ്ങൾ നോക്കിയിട്ടുണ്ടോ ?

ചത്തു മലച്ച മീനുകളുടേതു പോലെ ,

അത് നിശ്ചലവും അചേതനവുമാണെന്ന് കാണാം 

അത് പെണ്ണിന്റേതാണെങ്കിൽ ,

ഒരു മാൻകുട്ടി ചത്ത് കിടക്കുന്നത്ര നിർദോഷവുമായിരിക്കുമത് 

ഒരു ജന്മം നീളെ സ്‌നേഹം ദാഹിച്ചു വലഞ്ഞു പോയ -

പെണ്ണുങ്ങളെ കണ്ടിട്ടുണ്ടോ നിങ്ങൾ ?

അത് മരുഭൂമിയിലെ,

 ഇലകളൊന്നും ശേഷിക്കാത്ത ,

മരങ്ങളെ ഓർമിപ്പിക്കും .

പ്രണയം ഉണർന്നു വരുന്ന ഹൃദയമിടിപ്പ് -

കേട്ടിട്ടുണ്ടോ നിങ്ങൾ ?

അത് അരുവി ഒഴുകുന്നതിൻ്റെയോ ,

ഓടക്കുഴൽ വായിക്കുന്നതിൻ്റെയോ ശബ്ദമെന്ന് ,

നിങ്ങൾക്ക് തിരിച്ചറിയാനാവാത്ത വണ്ണം ,

ഇഴപിരിഞ്ഞ് കേൾക്കും ....

സ്നേഹിക്കുന്നവരുടെ ചുണ്ടുകളിലേക്ക് നോക്കണം ,

അത് അനങ്ങുകയും വിടരുകയും ചെയ്യുന്നത് ,

പൂവിരിയുന്നതു പോലെയാണെന്ന് കാണാം 

ജീവിതമെന്നത് എത്രമേൽ കണിശമായൊരു -

തിരഞ്ഞെടുപ്പാണെന്ന് ചിന്തിക്കുമ്പോഴാണ് ,

നഷ്ടബോധങ്ങളുടെ ഉപ്പുചാറുകൾ ,

തുള്ളിയായി ,നിങ്ങളുടെ തൊണ്ടക്കുഴിയിലേക്ക് 

കയ്പ്പ് ഇറ്റിക്കുന്നത് .....

ഇതുവരെ ജീവിച്ചില്ലല്ലോ എന്നറിയുമ്പോഴാണ് ,

ഏതു വഴിയിലൂടെ തിരിഞ്ഞ് ഓടാമെന്ന് തിടുക്കം കൂട്ടി ,

നിങ്ങൾ മരിച്ചു വീഴുന്നത്....

 എന്നിൽ നിന്ന് 

നിന്നെ കുറയ്ക്കുമ്പോഴാണ് ,

വലിയൊരു എന്നെ കിട്ടുന്നതെന്ന-

സമവാക്യമാണ് ,

ജീവിതത്തെ ഭംഗിയുള്ളൊരു -

പട്ടമാക്കിത്തീർത്തത് 💓💓

ആസുരം 

ചില നേരങ്ങളിൽ അങ്ങനെയാണ് ...
ഉറുമ്പുകൾ കുനു കുനെ ,
നിരനിരയായി പോകുന്നത് കാണുമ്പോൾ ,
എനിക്ക് ദേഷ്യം വരും .
ചവിട്ടിയരച്ചോ ,ചുട്ടെരിച്ചോ 
ഞാനവയെ തീർത്തു കളയും .
ഞാനിടപെടുമ്പോൾ ,
ഭയന്ന് അവ നിര തെറ്റുന്നതും ,
ചത്ത് വീഴുന്നതും കണ്ടാനന്ദിക്കും 

😡😡😡😡😡😡😡😡😡😡😡

മറ്റു ചിലപ്പോൾ ,

 ഒച്ചുകൾ ഇണചേരുന്നത് കണ്ട് ,
  എനിക്ക് ഓക്കാനം വരും 
  അവയിലൊന്നിനെ ,ഇനിയീ ജന്മത്തിൽ -
  കാണാനാവാത്തത്ര ദൂരത്തേക്ക് ,
  ഞാൻ വലിച്ചെറിയും .

😡😡😡😡😡😡😡😡😡😡😡😡
                                         
വേനലുച്ചകളിൽ ,
ഉണങ്ങിയ വാഴയിലകൾക്കിടയിൽ ,
കെട്ടിപ്പുണർന്ന പാമ്പുകൾക്ക് നേരെ -
കല്ലെറിഞ്ഞിട്ട് ഞാനോടി രക്ഷപ്പെടും 
 ഈ ശാപങ്ങളൊക്കെയും ,
 എനിക്കുമേൽ പെയ്തുവീഴുന്ന കാലം ,

 എന്നെയും കാത്തിരിക്കുമെന്ന്  ചിന്തിക്കാനോ ,

എനിക്ക് മനസ്സില്ല .

ഞാൻ

"ഞാൻ " എന്ന് പേരിട്ടൊരു പുസ്തകം ,

ആരാലും വായിക്കപ്പെടാതെ ,

അലമാരക്കുള്ളിൽ പൊടിപിടിച്ചു .

ചിലർ ,

എടുത്ത് പുറംചട്ട നോക്കിയും,

മറ്റു ചിലർ,

പെട്ടെന്ന് മറിഞ്ഞുകിട്ടുന്നൊരു,

 താള് വായിച്ചും 

തിരിച്ചുവച്ചു .....

ആമുഖം വായിച്ച് ,കൂട്ടിനെടുത്തവർ 

വായിക്കാതെ തന്നെ -

എവിടെയോ മറന്നു വച്ചു .

ഞാൻ  എന്ന് പേരിട്ട പുസ്തകം 

ആരാലും തൊടാതെ ,

പൊടിപിടിച്ചു .

അലമാര മാറാല മൂടി 

പുറംചട്ട നിറം മങ്ങി 

ചിതലരിച്ചു കയറിയത് ,

സ്നേഹം കുറിച്ചിട്ട താളുകളിലേക്ക് .....

"ഞാൻ" എന്ന് പേരിട്ടൊരു പുസ്തകം ,

മൺകൂനയിലേക്ക് ,

മൊഴിമാറ്റം ചെയ്യപ്പെടുന്നു.

സ്വാതന്ത്ര്യം

ഞാൻ-

 സ്വാതന്ത്ര്യം ചെയ്യപ്പെട്ട നാട്ടു രാജ്യം....

എൻ്റെ സ്വാതന്ത്ര്യം,

തെരുവ്നായയുടേത് പോലെയായിരുന്നു.

അതിന് - ,

ഉടമസ്ഥതയുടെ തുടലലങ്കാരമില്ല .

അതിന് -

അലഞ്ഞുതിരിയാൻ ,

അതിർത്തികളില്ല ..

അതിനു വിശപ്പടക്കാൻ ,

ഏത് കുപ്പയിലും തിരയാം ..

അതിന് -

ഏതു മറവിലും ഉറങ്ങാം ..

അതിന് കാമം തീർക്കാൻ-

ഏതുടലും തേടാം....

എൻ്റെ സ്വാതന്ത്ര്യം ,

ഒരു തെരുവ് നായയുടേത് പോലെ ....

അതിന് തിരിച്ചു ചെല്ലാൻ -

സ്വന്തമായൊരു കൂരയില്ല .

അതിനു മുഖം ചേർത്തുരസാൻ -

സ്നേഹമുള്ളൊരു യജമാനനില്ല 

എൻ്റെ സ്വാതന്ത്ര്യം ,

ഒരു തെരുവ് നായയാണ് ....

നീ

കണ്ണുനീരാണ്-
ഞരമ്പിലോടുന്ന
ചുവന്ന വെള്ളം

               രക്തമാണ്-

              എന്‍റെ കണ്ണില്‍ നിന്ന്

              നിന്നിലേക്കൊഴുകി വീഴുന്ന 

               ഉപ്പുവെള്ളം 

എനിക്ക് കടലായി പുനര്‍ജ്ജനിക്കണം
ജീവിതത്തിന്‍റെ ചൂടേറ്റു ബാഷ്പീകരിക്കണം
സ്വത്വ നഷ്ട്ടങ്ങളുടെ ഉപ്പ് രുചിക്കണം....
കാര്‍മേഘമായി ആകാശത്ത് പറന്നു നടക്കണം
വീണ്ടും ഖനീഭവിച്ച് എന്നിലേക്കുതന്നെ -
പെയ്തു വീഴണം.....